អភិបាលខេត្តសៀមរាប ឯកឧត្តម ប្រាក់ សោភ័ណ បានចូលរួមគោរពវិញ្ញាណក្ខន្ធ លោកអនុសេនីយ៍ទោ អ៊ុយ កុសល ជាយោធិន នៃកងពលធំអន្តរាគមន៍លេខ២ កងទ័ពជេីងគោក

សៀមរាប៖ នាថ្ងៃទី២០ ខែមករា ឆ្នាំ២០២៦ ឯកឧត្តម ប្រាក់សោភ័ណ បានចូលរួមគោរពវិញ្ញាណក្ខន្ធ និងបាននាំយកសារលិខិតរំលែកមរណទុក្ខ ព្រមទាំងថវិកាចំនួន ៨០លានរៀល ដែលជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ដេីម្បីប្រគល់ជូនដល់គ្រួសារ លោកអនុសេនីយ៍ទោ អ៊ុយ កុសល ជាយោធិន នៃកងពលធំអន្តរាគមន៍លេខ២ កងទ័ពជេីងគោក ដែលបានទទួលមរណភាពក្នុងពេលបំពេញបេសកកម្មនៅតាមបណ្តោយព្រំដែន នៅតំបន់ប្រាសាទតាក្របី ក្នុងជន្មាយុ ៤៧ឆ្នាំ។

ឯកឧត្តម ប្រាក់ សោភ័ណ បានគោរពថ្លែងអំណរគុណយ៉ាងជ្រាលជ្រៅបំផុតចំពោះ សម្តេចមហាបវរធិបតី នាយករដ្ឋមន្ត្រី និងលោកជំទាវបណ្ឌិត ដែលបានជួយគិតគូរ និងចូលរួមរំលែកទុក្ខដ៏សែនក្រៀមក្រំ និងសោកសង្រែកជាមួយនឹងក្រុមគ្រួសារ លោកអនុសេនីយ៍ទោ អ៊ុយ កុសល។

ក្នុងវេលាប្រកបដោយសេចក្តីទុក្ខដ៏ក្រៀមក្រំនេះ យេីងខ្ញុំសូមចូលរួមរំលែកនូវមរណទុក្ខជាមួយក្រុមគ្រួសាររបស់វីរៈយុទ្ធជនដ៏អង់អាចក្លាហាន ដោយសេចក្តីសោកស្តាយ អាឡោះ អាល័យបំផុត និងសូមឧទ្ទិសបួងសួងដល់ដួងវិញ្ញាណក្ខន្ធរបស់ លោកអនុសេនីយ៍ទោ អ៊ុយ កុសល បានសោយសុខក្នុងសុគតិភព កុំបីឃ្លៀងឃ្លាតឡើយ៕